مين مسمعش عن التوبة في الكنيسة، او من واعظ بيوعظ في الكنيسة؟! ده غالباً كل ما بندخل اجتماع مش بنسمع غير عن التوبة وازي نتوب وازي نبطل الخطية وطرق تبطيل الخطية وغيرها!!
وغالباً بيكون الكلام ده خالي من العمق وما هو الا دروشة متلونة بشوية كلام روحي واعداد من الكتاب المقدس ليس لها اي عمق!
طيب هو الكتاب المقدس فهمنا التوبة ازي؟!
وَلاَ تُشَاكِلُوا هذَا الدَّهْرَ، بَلْ تَغَيَّرُوا عَنْ شَكْلِكُمْ بِتَجْدِيدِ أَذْهَانِكُمْ، لِتَخْتَبِرُوا مَا هِيَ إِرَادَةُ اللهِ: الصَّالِحَةُ الْمَرْضِيَّةُ الْكَامِلَةُ (رومية 12: 2)
تَغَيَّرُوا عَنْ شَكْلِكُمْ في اليوناني "μεταμορφοῦσθε" والكلمة ده بتتنطق "ميطامرفوا" ومعانها حالة من التغير في الشكل الداخلي [1]
أَذْهَانِكُمْ في اليوناني "νοός" والكلمة ده بتتنطق "نوس" ومعانها عقل
ومن الكلمتين (تَغَيَّرُوا "μετα" تنطق ميطا، أَذْهَانِكُمْ "νοός" تنطق نوس) يطلع لفظ ميطانوس اللي احنا بقينا بنقوله دلوقتي "ميطانيا"
الميطانيا هي حالة من التغير في الشكل الداخلي بتم جوه العقل!
وهي الوصف الكتابي للتوبة، لان في الحقيقة التوبة مش تبطيل الخطية ولا اني ابطل اعمل خطية معينة وبس، لكنها حالة تغيير بتم في العقل عن اقتناع كامل بمعني، اني مثلاً لو بفكر ان القتل شيء طبيعي تبقي الميطانيا بتاعت القتل هي اني اقول ان القتل شيء شاذ عن الطبيعة ومش مجرد قول وبس لكن قول ناتج عن تغيير حصل في الداخل في الذهن.
ومن نفهم ان التوبة هي ميطانيا يعني تغيير داخلي عميق بيتم داخل ذهن الانسان وبيحول طريقة من الظلمة للنور.
#السنيرجيا (عمل الروح القدس في التوبة)
وهنا يجي السؤال هل التغيير ده انا اللي بعمله؟! يعني هل انا اللي بتغير؟! ولا في حاجة بتغيرني؟!
في مصطلح اسمه (Synergy - سنيرجيا) وده عبارة عن كلمة يونانية الأصل معناها (وحدة العمل) وقد صارت اصطلاحاً لاهوتياً عميقاً يشرح التعليم الأرثوذكسي في كيفية اتفاق النعمة مع الجهد البشري في كل عمل صالح[2]
التغيير او خلينا نقول الميطانيا هي عمل مشترك بين النفس والروح القدس، النفس دورها انها بتقرر انها تتغير ولكن التغيير ده عمل الروح القدس في النفس البشرية، فعلشان تكون التوبة حقيقة ونابعة فعلاً من الداخل (ميطانيا) لابد انها تكون بشركة مع الروح القدس في علاقة سنيرجيا زي ما وضحنا معانها.
1- انا محتاج اتعمق افكاري ودوفعي وسلوكي:
عملياً انا علشان اتوب محتاج اول حاجة اعملها اني اتعمق افكاري واعماقي لان زي ما قولنا التوبة تغير داخلي عميق مش مجرد تغير في الشكل الخارجي لان "الروح القدس لا يعمل في السطح ولا من الظاهر، إنه يعمل في الداخل وفي الخفاء جداً."[3] وبالتالي علشان التقي مع الروح القدس وابدأ في علاقة السنيرجيا ده لازم اتعمق افكاري ودوفعي وسلوكي، وتكون ده اول خطوة للتوبة وبمجرد ما اعمل كده هلقي ضميري بستيقظ وبينبهني للاشياء اللي عملتها ان كانت شر او شبه شر وفي اللحظة ده هلتقي مع الروح القدس اللي بدوره هيدخل معايا في شركة هدفها خلاص نفسي!
علشان كده الميطانيا اللي بنعملها في الكنيسة بتبدأ بصلاة صرخة فيها بنتعمق كل دوافعنا بتتلخص في كلمتين "يارب ارحم"، كل ما بشوف التشويه الداخلي الموجود جوايا وكل ما ضميري بيستيقظ علي حاجات انا عملتها مش بيكون قدامي غير كلمة واحدة اقولها هي "يارب ارحم".
ناس كتير بتستغرب ليه في يوم الجمعة العظيمة (يوم الخلاص) بنقول يارب ارحم وميطانيات 400 مرة هل هي بالعدد؟! طبعاً لا لكن الكنيسة بوعي روحي للميطانيا عاوزه تقولنا ان اليوم ده تذكار للخلاص وبتاخدنا لغايت الصليب علشان نسيب كل خطايانا هناك وكل ميطانيا ويارب ارحم بتخرج اللي جوانا وبقدر ما نكون امناء بقدر ما الروح القدس بينزع من جوانا كل ربط الخطية.
2- الخضوع لسلطان الروح القدس:
مع بداية صرختك هيكون روح المسيح بستيقظ فيك، والوقت ده مش وقت للكلام لكنه وقت للخضوع زي ما بيقول الكتاب: "الْيَوْمَ، إِنْ سَمِعْتُمْ صَوْتَهُ فَلاَ تُقَسُّوا قُلُوبَكُمْ"[4] وزي ما علمتنا الكنيسة ان اعلان الخضوع لشخص هو بالسجود، فعلشان كده الخطوة التانيه في الميطانيا هي السجود (الخضوع).
وكانك بتعلن قدام الروح القدس، انك بتسلم ليه قلبك، علشان يبدأ يشتغل معاك علي خلاص نفسك ويبدأ فعلاً التغيير الداخلي العميق اللي هيغير حياتك كلها لصورة المسيح نفسه، لانه ببساطة الروح القدس بياخد كل ما للمسيح وبيعلنهولك[5]
3- روح القيامة:
في الوقت اللي بنسجد فيه علي شكل الصليب "علشان نعلن اننا نحمل الصليب وراء المسيح" بيبدأ الروح القدس يتعامل مع اروحنا البشرية ويبدأ يغير في الذهن علشان كده في سجودك مستعجلش متقومش من علي الارض الا لما تشعر من اعماقك ان الروح القدس بيدفعك انك تقوم، متقومش الا لما تشعر فعلياً انك حصلت علي شيء حصلت علي "روح القيامة".
روح القيامة، او الروح المحي هتشعر بيه زي ما شعر بيه دانيال كده[6] قوة كده ليها لذة هتدفعك انك تصلي وهتملي قلبك كلام، خليك امين واوعي تخلي نفسك تقود الصلاة، او مشاعرك وعاطفتك هي اللي تقود الصلاة، سيب الروح القدس ياخد الدفة ويحركك، وقتها هتخرج منك صلاة هتقول لنفسك هو انا بقول الكلام ده ازي. وهنا فعلاً هتبدأ حركة التوبة الحقيقة جواك.
التوبة سر عميق قوي لانها مش مجرد لحظة في الحياة بتحصل وبعد كده خلاص بتبقي شخص تايب، لا الشخص التايب ده شخص عايش في سر التوبة، كل يوم بيتوب كل لحظة بيتوب وكل لحظة بيتعمق افعاله واقواله وبيقول مع دواد "لِتَكُنْ أَقْوَالُ فَمِي وَفِكْرُ قَلْبِي مَرْضِيَّةً أَمَامَكَ يَا رَبُّ"[7]، فبتتحول التوبة الي حياة، مش مجرد محاولة فاشلة لاني ابطل خطية معينة علي قد ما هي سعي في الشركة مع الروح القدس اللي بيقود حياتي في سر عظيم اسمه سر التوبة، وتصير التوبة حياة مش مجرد لحظات بنقضيها في الصلاة او الميطانيات.
فادي مندي
19/1/2016
هوامش:
1- HELPS Word-studies - 3339
2- مع الروح القدس في جهادنا اليومي - الاب متي المسكين - الغلاف
3- نفس المرجع ص5
4- (عب 3: 15)
5- راجع (يو 16: 14)
6- راجع (دانيال 10: 10)
7- راجع (مز 19: 144)